+7 (707) 350 02 20
2025 жылғы 15 наурызда Мемлекет басшысы Қазақстан Республикасының жаңа Бюджет кодексіне қол қойды. Құжат салық-бюджет және фискалдық саясатты жетілдіру, бюджет процесін оңтайландыру, парламенттік бақылауды күшейту және мемлекеттік қаржының ашықтығын арттыру бойынша негізгі өзгерістерді қамтиды.
Маңызды жаңалықтардың бірі – бюджет процесінің мерзімдері мен кезеңдерін қысқарту. Мемлекеттік органдарға 15%-ға дейінгі бюджет қаражатын қайта бөлу құқығы берілді. Сонымен қатар, пайдаланылмаған бюджет қаражатын келесі жылдың басында жұмсауға мүмкіндік қарастырылған.
Парламенттік бақылау күшейтіліп, мемлекеттік кепілдіктер, үкіметтік қарыз және квазимемлекеттік сектордың міндеттемелері бойынша шектеулер заң жүзінде бекітілетін болды.
Бюджеттің кіріс бөлігін жоспарлау және квазимемлекеттік сектор субъектілерінің дивидендтік саясатына ерекше назар аударылды. Бұл шаралар мемлекеттік ресурстарды тиімді пайдалануға бағытталған.
Ұлттық қорды пайдалану жинақтау функциясына негізделеді. Қор қаражатын ішкі қаржы құралдарына орналастыруға тыйым салынады. Ал мақсатты трансферт тек аса маңызды жобаларды қаржыландыруға бағытталады.
Мемлекеттік борыштық саясатты бақылау күшейтіліп, мемлекеттік сектордың қарыздық міндеттемелерін қадағалаудың жаңа тетіктері енгізілді. Квазимемлекеттік сектордың сыртқы қарызы заң жүзінде шектеледі.
Сондай-ақ, халықтық қатысу бюджеті заң жүзінде бекітіліп, азаматтардың бюджет қаражатын бөлу процесіне белсенді қатысуына мүмкіндік берілді.
Қабылданған өзгерістер мемлекеттік қаржының ашықтығын және тиімділігін арттыруға, бақылауды күшейтуге және тұрақты экономикалық дамуға жағдай жасауға бағытталған.