+7 (707) 350 02 20
Қазақстан Республикасы Қаржы министрлігінің Ішкі мемлекеттік аудит комитеті кәсіби бухгалтерлерді сертификаттау ұйымдарын (КБСҰ) тексеріп, Қазақстанда әрбір кәсіби бухгалтер кәсіби ұйымның мүшесі болуы қажет екенін еске салды.
Бүгінде елімізде 20 КБСҰ тіркелген. Олардың қызметіне профилактикалық бақылау жүргізіледі. Бұл – Кәсіпкерлік кодекспен реттелетін алдын алу шарасы.
Тексеру нәтижесінде бірнеше заңбұзушылықтар анықталды. Кейбір ұйымдар есептілікті уақытында тапсырмаған, емтихан комиссиясын дұрыс құрмаған және сертификаттарды беру тәртібін бұзған. Сонымен қатар, емтихан барысы бейнетіркеусіз өтіп, жазба материалдар сақталмаған. Тәуелсіз бақылаушылардың болмауы да тіркелген. Үміткерлердің жеке істері дұрыс сақталмаған.
Комитет нормативтік талаптардың сақталуын күшейту және сертификаттау сапасын арттыру туралы ұсынымдар берді.
Еске саламыз: «Бухгалтерлік есеп пен қаржылық есептілік туралы» Заңның 1-бабына сәйкес, кәсіби бухгалтер — бұл сертификаты бар және кәсіби ұйымның мүшесі болып табылатын жеке тұлға.
Сондықтан Комитет кәсіби бухгалтер біліктілігін алған мамандарға Қазақстан аумағында жұмыс істейтін кәсіби бухгалтерлер ұйымына мүшелікке кіруді ұсынады.