+7 (707) 350 02 20
Қазақстан Республикасының Ұлттық экономика министрлігі Салық кодексінің жаңа және қолданыстағы нұсқасына екінші өзгерістер топтамасын Мәжіліске жолдады. Ұсынылған түзетулер салық салудың маңызды бағыттарын қамтиды, соның ішінде жеке табыс салығы (ЖТС), корпоративтік табыс салығы, әлеуметтік төлемдер және шегерімдер тәртібі.
Негізгі өзгерістердің бірі – ЖТС мөлшерлемесін азаматтардың табысына қарай саралау. Табысы төмен азаматтар үшін салық төмендетіледі, ал жоғары жалақы алатындар бұрынғы мөлшерлеме бойынша төлейді.
Сондай-ақ, қазіргі кезде қолданыстағы түрлі шегерімдердің орнына 30 АЕК көлемінде бірыңғай айлық шегерім енгізу ұсынылады. Бұл бухгалтерлер үшін есептеуді жеңілдетеді және азаматтардан артық құжат жинауды талап етпейді.
Корпоративтік салық салу да нақтыланады. Банктік қызметке арналған мөлшерлеме айқындалып, Экспорттық-кредиттік агенттік үшін салық салу тәртібі енгізіледі. Бұл қаржы секторындағы құқықтық анықсыздықты жояды.
Мемлекеттік және квазимемлекеттік бағалы қағаздардан түсетін табысқа салық салу ұсынылады. Бұл бюджеттің кіріс бөлігін арттырады.
Халық денсаулығын қорғау мақсатында, халықаралық тәжірибеге сүйене отырып, энергетикалық сусындарға акциз енгізу қарастырылған.
Мұнай саласына қатысты салық реформасы аясында «салықтық маневр» жүзеге асырылмақ. Бұл экспорттық төлемдерден, оның ішінде ренталық салықтан, мұнай өндіруге салынатын салыққа жүктемені ауыстыруды көздейді.
Салық әкімшілендіру бағытында бақылау күшейтіліп, салық міндеттемелерін жинау мен мониторингтеу тетіктері қайта қаралады.
Екінші топтама аясында тұрғын үй-коммуналдық шаруашылық, инвестициялық саясат, әлеуметтік төлемдер және арнайы салық режимдеріне қатысты заңдарға да өзгерістер енгізіледі. Міндетті әлеуметтік және медициналық сақтандыру салаларындағы бұзушылықтар үшін жауапкершілік күшейтіледі.
Екі топтамада жаңа Салық кодексі мен оған ілеспе заңдарға 71 түзету, ал қолданыстағы кодекске 67 өзгеріс ұсынылған.