+7 (707) 350 02 20
Қазақстан Президенті тауардың шыққан елін анықтау тәртібін жетілдіруге бағытталған заңға қол қойды. Бұл өзгерістер отандық тауар өндірушілерді қолдауға және мемлекеттік сатып алу жүйесін цифрландыруға бағытталған.
Басты жаңалық – Қазақстандық тауар өндірушілердің тізілімі енгізілді. Бұл электрондық үкімет инфрақұрылымының бір бөлігі ретінде жұмыс істейтін ақпараттық жүйе отандық компаниялар мен олардың өнімдері туралы мәліметтерді қамтиды. Тізілімге енген өндірушілер мемлекеттік сатып алуға қатысу және мемлекеттік қолдау шараларына ие бола алады.
Осыған байланысты тауардың шыққан елін растау үшін қолданылған СТ-KZ сертификаты мен индустриялық сертификат жойылады. Сонымен қатар, сараптама актілерін беру кезінде бұзушылықтар үшін әкімшілік жауапкершілік алынып тасталды.
Екінші блок ішкі елдік құндылық институтын дамытуға бағытталған. Үлкен тапсырыс берушілер үкімет бекітетін ережелерге сәйкес арнайы даму бағдарламаларын әзірлеп, жүзеге асыруға міндетті.
Жаңа құрал ретінде кепілдендірілген сатып алу шарты енгізілді. Бұл шарт өңдеуші өнеркәсіп кәсіпорындарына өндірістік қуаттылық есебінен тұрақты көлемде өнім жеткізуге мүмкіндік береді.
Сондай-ақ, Тауарлар, жұмыстар және көрсетілетін қызметтердің жалпы классификаторы енгізіледі. Бұл жүйе бірыңғай кодтау жүйесін қамтамасыз етіп, тауар айналымының ашықтығын арттырады және көлеңкелі экономиканы азайтады.