+7 (707) 350 02 20
«КазАгроФинанс» АҚ ауыл шаруашылығы техникасын 6% жылдық мөлшерлемемен жеңілдікпен лизингке беру бағдарламасының қайта басталғанын хабарлады. Бұл – фермерлерге тракторлар мен комбайндарды бастапқы шығынсыз жаңартуға мүмкіндік беретін тиімді құрал.
Бағдарлама бойынша қазақстандық өндірістегі 3 бірлікке дейінгі өздігінен жүретін техниканы бастапқы жарнасыз, кепілсіз және 10 жылға дейінгі мерзіммен лизингке алуға болады. Бір клиентке берілетін қаржыландыру көлемі – 205 миллион теңгеге дейін.
Компанияның хабарлауынша, бағдарлама шағын және орта шаруашылықтар үшін тиімді, себебі олар көбіне алдын ала төлем жасай алмайды және ұзақ мерзімді жоспарлау маңызды.
«КазАгроФинанс» АҚ басқарма төрағасы Айдар Прашев негізгі шарттардың өзгермегенін атап өтті: 6% мөлшерлеме, алғашқы төлем – 0%, кепіл қажет емес. Бұл ауыл еңбеккерлеріне өз шаруашылығына толық көңіл бөлуге мүмкіндік береді.
Айта кету керек, бұл бағдарлама 5% мөлшерлемемен әрекет етіп тұрған жеңілдікпен лизингтен ерекшеленеді. 5% бағдарламасында 10% бастапқы жарна мен 7 жылға дейінгі мерзім қарастырылған. Дегенмен, негізгі қарыз бойынша жеңілдік мерзімі 2025 жылдың соңына дейін сақталады.
Өтінімдерді Telegram-бот арқылы немесе «КазАгроФинанс» өңірлік филиалдарына барып беруге болады. Қосымша ақпарат компанияның ресми сайтында қолжетімді.