+7 (707) 350 02 20
Қазақстан Республикасы Қаржы министрлігі Онлайн бюджет мониторингі (ОБМ) модулін кеңейту арқылы бюджеттік шығыстарды бақылауды цифрлық форматқа көшіруде. Бұл жүйе бюджет қаражатын мақсатты пайдалануды нақты уақыт режимінде бақылауға мүмкіндік береді және заңбұзушылықтардың алдын алуға көмектеседі.
ОБМ модулі күн сайын 6 000-нан астам мемлекеттік мекемелерде 140 млн теңгеден асатын төлемдерді бақылайды. Мониторинг білім беру, денсаулық сақтау, мәдениет, туризм және спорт салаларын қамтиды.
2025 жылдың басынан бері цифрлық аудит арқылы 664 млн теңгеден астам қаражатты тиімсіз жұмсаудың алдын алды. Алайда заңсыз төлемдер орын алуда. Мысалы, БҚО-дағы кітапханада бухгалтердің шотына 45 млн теңгеден астам қаражат заңсыз аударылғаны анықталды. Алматы қаласында тексеруден кейін гимназия директоры мен бірнеше бухгалтер жұмыстан босатылды.
ОБМ тәуекелдер туралы автоматты түрде хабарламалар жіберуді енгізді — бұл ақпарат мониторинг объектілеріне және Сыбайлас жемқорлыққа қарсы іс-қимыл агенттігіне жіберіледі. Бұл бақылаудың жеделдігі мен тиімділігін арттырады.
Қаржы министрлігі Электрондық қаржы орталығымен бірлесіп, бюджет қаражатын заңсыз алғандарды мобильді қосымша арқылы өз еркімен қайтару функциясын әзірлеуде.
«Онлайн бюджет мониторингі» модулі бюджеттік үдерістердің ашықтығын арттырып, мемлекеттік шығыстарды цифрлық бақылау арқылы тиімді басқаруға жол ашады.