+7 (707) 350 02 20
Қазақстанда салық салу тәртібі жаңартылып, жаңа Салық кодексі күшіне енді. Онда ірі бизнес, шағын және орта кәсіпкерлік, жеке кәсіпкерлер мен өзін-өзі жұмыспен қамтығандар үшін нақты салық мөлшерлемелері көрсетілген.
Ірі бизнес үшін корпоративтік табыс салығы (КТС) — 20%. Ал банктер, казинолар, букмекерлер мен тотализаторлар үшін — 25%. Қосылған құн салығы (ҚҚС) — 16%. Әлеуметтік салық 6%-ға төмендетілді.
Қызметкерлер үшін міндетті төлемдер:
— жеке табыс салығы (ЖТС) — 10%
— зейнетақы жарналары — 10%
— әлеуметтік салық — 11%
— әлеуметтік аударымдар — 5%
— міндетті медсақтандыру — 3%
Шағын және орта бизнес (ЖШС) 20% КТС, 6% әлеуметтік салық және қызметкерлер үшін аударымдар төлейді. Егер айналым 10 000 АЕК-тен (39 млн теңге) аспаса — ҚҚС төлеуден босатылады. Тек халықпен жұмыс істейтін және табысы 600 000 АЕК-тен (2,36 млрд теңге) аспайтын бизнес жеңілдетілген режиммен (СНР) 4% ставка бойынша салық төлей алады (немесе 2%, егер әкімдік шешсе).
Ауыл шаруашылығы өндірушілері үшін КТС — 3%, кооперативтер үшін — 6%. Коммерциялық емес медицина ұйымдары үшін 5% ставка белгіленген. Кейбір дәрілік заттар ҚҚС-тан босатылады.
Жеке кәсіпкерлер 8500 АЕК-ке дейінгі табысқа 10% ЖТС төлейді. Артық табысқа — 15%. Егер жалпы тәртіпте жұмыс істеп, табыс 10 000 АЕК-тен асса, ҚҚС тіркеуіне тұруы тиіс.
Өзін-өзі жұмыспен қамтығандар ай сайынғы табысы 300 АЕК-тен аспаса (1,17 млн теңге) және жалдамалы жұмысшы болмаса, бірыңғай 4% салық төлейді. Бұл төлем барлық бұрынғы салықтар мен аударымдарды алмастырады.
Жаңартылған Салық кодексі кейбір жеңілдіктермен қатар, салық төлеушілер санын кеңейтіп, бақылауды күшейтті.