+7 (707) 350 02 20
Биыл Қазақстанда жаңа кәсіби мереке бекітілді – Кәсіпкерлер күні. Ол жыл сайын 29 қазанда аталып өтеді. Тиісті бұйрық 2025 жылғы 30 шілдеде Еңбек және халықты әлеуметтік қорғау министрлігі тарапынан қол қойылды.
Бұл күннің таңдалуы тарихи мәнге ие. Дәл 2015 жылғы 29 қазанда Қазақстан Республикасының Кәсіпкерлік кодексі қабылданған болатын. Ол бизнес, инвестиция және бәсекелестік саласындағы негізгі заңдарды біріктіріп, кәсіпкерлікті қолдауға арналған мемлекеттік саясаттың негізін қалады.
Бүгінде елде 2,3 миллионнан астам бизнес субъектісі тіркелген. Кәсіпкерлерді қолдау – экономикалық саясаттың басым бағыты. 2025 жылдың басынан бері жалпы сомасы 288 миллиард теңгеге 2 мыңнан астам жоба субсидияланды, 61 миллиард теңгеге 737 жобаға кепілдік берілді. Тоғыз мыңға жуық кәсіпкер оқудан өтті.
Ағымдағы жылы шағын және орта бизнесті дамытуға 270 миллиард теңгеден астам қаражат бөлінеді. «Өрлеу» жеңілдетілген несиелеу бағдарламасы іске қосылды. Оның пайыздық мөлшерлемесі – 12,6%. Жалпы қаржыландыру көлемі 750 миллиард теңгені құрайды. Оның ішінде 300 миллиард теңге «Даму» қоры есебінен, 450 миллиард теңге – банктік ресурстардан бөлінеді. Қазірдің өзінде 200 миллиард теңге көлемінде 400-ге жуық жоба қаржыландырылды.
Кәсіпкерлердің хабардарлығын арттыру мақсатында «Цифрлық бизнес картасы» жобасы енгізілді. 100-ден астам қолдау шараларын қамтитын Реестр бекітілді. Сонымен қатар «Бәйтерек» холдингінің қолдау шаралары көрсетілген «Bgov» ақпараттық жүйесі «eGov Business» қосымшасымен біріктірілді. Қызметті 71 мың пайдаланушы 2,3 миллион рет қолданды.