+7 (707) 350 02 20
Қазақстан Республикасының жаңа Салық кодексінің енгізілуіне байланысты оңайлатылған декларация негізіндегі арнайы салық режиміне (АСР) өту туралы хабарламаларды қабылдаудан бас тарту жағдайлары жиілеп кетті.
Бас тартулар Мемлекеттік кірістер комитетінің ақпараттық жүйесінде салық төлеуші көрсеткен экономикалық қызмет түрінің (ЭҚЖЖ / ОКЭД) қолданыстағы Жалпы экономикалық қызмет түрлерінің жіктеуішіне сәйкес келмеуіне байланысты қалыптастырылады.
Бас тартудың негізгі себебі — салық төлеушілердің өзгертілген немесе жіктеуіштен алынып тасталған ОКЭД кодтарын қолдануы. Атап айтқанда, ҚР Сауда және интеграция министрлігі Техникалық реттеу және метрология комитетінің 2023 жылғы 16 қазандағы № 393-НҚ және 2023 жылғы 28 қарашадағы № 468-НҚ бұйрықтарымен НК РК 03-2019 «Экономикалық қызмет түрлерінің жалпы жіктеуіші» құжатына № 2 және № 3 өзгерістер бекітіліп, олар 2024 жылғы 1 сәуірден бастап күшіне енді.
Мысалы, 86900 ОКЭД коды жойылып, оның орнына 86901 және 86909 кодтары енгізілді, 62022 коды жіктеуіштен алынып тасталды және басқа да өзгерістер енгізілді.
Осыған байланысты салық төлеушілер АСР-ға өту туралы хабарлама бермес бұрын тіркеу деректерін қолданыстағы ОКЭД редакциясына сәйкестендіруі қажет:
-
жеке кәсіпкерлер — ЖК ретінде қызметті бастау туралы хабарламаны (тіркеу деректерін өзгерту) ұсыну;
-
заңды тұлғалар — тіркеуші органдар арқылы немесе «Е-статистика» жүйесінің корреспондент кабинеті арқылы мәліметтерді өзгерту туралы өтініш беру.
Экономикалық қызмет түрі жаңартылғаннан кейін және оңайлатылған декларация негізіндегі АСР қолдану талаптары сақталған жағдайда, салық төлеуші салық режимін қолдану туралы хабарламаны қайтадан ұсынуға құқылы.
Еске саламыз, оңайлатылған декларация негізіндегі АСР-ға өту туралы хабарлама 2026 жылғы 1 наурыздан кешіктірмей ұсынылуы тиіс.
Аталған хабарлама ұсынылмаған жағдайда, салық төлеуші 2026 жылғы 1 қаңтардан бастап жалпыға бірдей салық салу тәртібін қолданушы болып танылады.