+7 (707) 350 02 20
5 наурыз күні «Атамекен» ҰКП алаңында мемлекеттік органдар мен бизнес өкілдерінің қатысуымен республикалық онлайн-семинар өтті. Іс-шараның негізгі тақырыбы шағын және микробизнес үшін «таза парақ» механизмін енгізу болды.
Семинарда ҚР Қаржы министрлігі Мемлекеттік кірістер комитеті төрағасының орынбасары Сеилжан Ахметов сөз сөйлеп, 2026 жылғы 1 қаңтардан бастап күшіне енген кәсіпкерлерді қолдау шаралары туралы түсіндірді.
Жаңа ретроспективті әкімшілендіру саясатына сәйкес, 2025 жылғы 17 желтоқсанға дейін тапсырылған бұрынғы кезеңдерге қатысты салық есептілігі бойынша камералдық бақылау жүргізілмейді. Сонымен қатар, 2026 жылға дейінгі кезеңдер бойынша салықтық тексерулерге іс жүзінде мораторий енгізіледі. Бұл талап жер қойнауын пайдалану, қарсы тексерулер немесе прокуратура талап еткен жағдайларға қолданылмайды.
Сонымен қатар мемлекет 2026 жылға дейін шағын бизнес субъектілері арасында жасалған мәмілелерді жарамсыз деп тану туралы талап-арыздарды беруді тоқтатады. 2026 жылғы 1 қаңтарға дейінгі кезеңдердегі ҚҚС бойынша есепке уақытылы тұрмау фактілері бойынша істер қозғалмайды.
Шағын бизнесті бұрынғы есептілік негізінде жабу камералдық бақылаусыз жеңілдетілген тәртіппен жүзеге асырылады.
МКК мәліметінше, салықтық рақымшылықтың көлемі 100 млрд теңгеге дейін жетуі мүмкін. Егер кәсіпкерлер 2026 жылғы 1 қаңтар мен 31 наурыз аралығында негізгі қарызын толық өтесе, барлық өсімпұлдар мен айыппұлдар есептен шығарылады.
2025 жылғы қарашадағы жағдай бойынша 67 мың шағын және микробизнес субъектілерінің жалпы берешегі 273 млрд теңгені құраған. Негізгі қарыздың 176 млрд теңгесі өтелген жағдайда, 90 млрд теңге өсімпұл және 7 млрд теңге айыппұл толық кешіріледі.
Сонымен қатар ҚҚС бойынша тіркеу шегінен асқан шамамен 15 мың кәсіпкер міндетті тіркеуден және оған байланысты санкциялардан босатылады.
Алайда «таза парақ» механизмі 2026 жылғы 1 қаңтардағы жағдай бойынша шағын және микробизнес санатына жататын кәсіпкерлерге ғана қолданылады. Кедендік төлемдер бұл механизмге кірмейді.
Арнайы салық режимдеріне қатысты да өзгерістер түсіндірілді. Упрощенная декларация режимі бойынша қызметкерлер санына қойылатын шектеу алынып тасталды. Бұрын лимит 30 қызметкер болса, енді кәсіпкерлер қызметкерлерді шектеусіз жалдай алады.
Жылдық айналым шегі ҚҚС-сыз 2,5 млрд теңге деңгейінде белгіленді. Салық мөлшерлемесі өңірлерге байланысты: Астана мен Алматыда – 3%, ал көптеген басқа өңірлерде – 2%.
Сонымен қатар 2026 жылғы 1 наурызға дейін жеңілдетілген режимді қолдану туралы хабарлама бермеген кәсіпкерлер автоматты түрде жалпыға бірдей салық салу режиміне ауыстырылды.