+7 (707) 350 02 20
Қазақстан Республикасының Президенті ҚР Салық кодексіне өзгерістер мен толықтырулар енгізу туралы заңға қол қойды. Құжатта кодекстің жекелеген нормаларын нақтылауға бағытталған түзетулер көзделген және олар 2026 жылғы 1 шілдеден бастап күшіне енеді.
Өзгерістердің басым бөлігі редакциялық және терминологиялық сипатқа ие әрі қолданыстағы заңнамалық терминологияны біріздендіруге бағытталған.
Атап айтқанда, Салық кодексінің бүкіл мәтіні бойынша «шетелдік» термині «шетел азаматы» терминімен ауыстырылды. Сондай-ақ «тенге» сөзі мемлекеттік тілдегі жазылуына сәйкес «теңге» түрінде қолданылатын болады.
Бұдан бөлек, әкімшілік-аумақтық бірліктердің, мемлекеттік органдар мен институттардың атаулары нақтыланды. Бірқатар нормаларда қолданылатын терминология жаңартылып, «Парламент» атауының орнына «Құрылтай», ал «республикалық референдум» орнына «жалпыхалықтық референдум» атауы енгізілді.
Сондай-ақ құжатпен Қазақстан Республикасы Конституциялық Сотына азаматтардың жүгінуіне қатысты жекелеген нормалар алып тасталып, Салық кодексінің бірқатар баптарына редакциялық өзгерістер енгізілді.
Заң 2026 жылғы 1 шілдеден бастап қолданысқа енгізіледі.