+7 (707) 350 02 20
2026 жылғы 19 шілдеден бастап Қазақстанда Банкаралық мобильді төлемдер жүйесінің (БМТЖ) сервистері ресми түрде іске қосылады. Енді қазақстандықтар әртүрлі банктер арасында телефон нөмірі арқылы ақша аударып, тауарлар мен қызметтер үшін бірыңғай QR-код арқылы төлем жасай алады.
Жүйеге мобильді қосымшалар арқылы халыққа бөлшек қызмет көрсететін банктер қосылған. Соның арқасында БМТЖ-ға қатысушы банктердің клиенттері ақша жіберуші мен алушының немесе сатып алушы мен сатушының қай банктің қызметін пайдаланатынына қарамастан, аударымдар мен төлемдерді жүзеге асыра алады.
Операциялар нақты уақыт режимінде жүргізіліп, тәулік бойы қолжетімді болады.
Банкаралық QR-төлемдер қалай жұмыс істейді?
Негізгі жаңашылдықтардың бірі — сатып алушы мен сатушыға қызмет көрсететін банкке қарамастан, QR-код арқылы төлем жасау мүмкіндігі. Кәсіпкерлер бір QR-кодтың көмегімен жүйеге қатысушы әртүрлі банктердің клиенттерінен қолма-қол ақшасыз төлем қабылдай алады.
Бұл ретте төлем қабылдау үшін қосымша жабдық орнатудың қажеті жоқ. Сервис қолданыстағы төлем инфрақұрылымына енгізіледі. Жаңа функцияның қолжетімділігі және мобильді қосымшаны жаңарту қажеттілігі туралы ақпаратты клиенттер өз банкінен нақтылай алады.
Ұлттық цифрлық қаржы инфрақұрылымына не кіреді?
Банкаралық мобильді төлемдер жүйесі Қазақстанның Ұлттық цифрлық қаржы инфрақұрылымының бір бөлігі болып табылады. Ұлттық төлем жүйесінен бөлек, оның құрамына биометриялық сәйкестендіру, цифрлық теңге, ашық банкинг платформалары және Ұлттық антифрод-орталық кіреді.
Қазақстан Ұлттық Банкінің мәліметінше, Ұлттық төлем жүйесі күн сайын шамамен 6,3 трлн теңге көлеміндегі операцияларды өңдейді. Айналымға шығарылған цифрлық теңге көлемі 340 млрд теңгеден асты, ал биометриялық сәйкестендіру сервисі ай сайын шамамен 3,5 млн сұрауды өңдейді.
Ұлттық антифрод-орталық жұмыс істеген уақыт ішінде алаяқтық пен басқа да заңсыз операциялардың 165 мыңнан астам жағдайы анықталған. Олардың қатарында қаржы пирамидалары мен заңсыз ойын бизнесіне байланысты операциялар да бар.
Ұлттық цифрлық қаржы инфрақұрылымын дамыту Қазақстандағы қаржы қызметтерінің қолжетімділігін, қауіпсіздігін және ыңғайлылығын арттыруға бағытталған.